سؤال بيلح عليا دلوقتي.لو في اشخاص من المحبوسين دلوقتي المحكمه معرفتش تمسك عليهم ادله ادانه قويه,او في اكثر التصورات جموحا لقت ان المتهم اللي قدامهم بري :) و اضطرت انها تفرج عنه يا تري الوضع في مصر هيبقي عامل ايه؟

و الله الكلام ده بيحصل كتير و ياما اتحاكم ناس الشعب كله عارف انهم حراميه بما فيهم القاضي و المحامي و لكن مفيش ادله قويه=مفيش تهمه! و ابرز مثال علي كده ال كابوني اللي معرفوش يثبتوا عليه تهمه فحبسوه بتهمه التهرب الضريبي!!

هل مصر مستعده انها تسمع عن ان مسئول كبير افرج عنه لعدم كفايه الادله؟! باختصار هل المحاكمات المدنيه الطبيعيه اللي كلنا بننادي بيها مستعدين نقبل بيها لو طلعت لينا بحكم من النوع ده ولا البلد هتولع تاني و ندخل في دوامه لا تنتهي؟هل الحل هو محكمه ثوره استثنائيه تشفي الغليل لكن تضيع فلوسنا و الادهي انها اكيد هتاخد في وشها ابرياء كتير؟

اول بوست في بلوج ليا؟! احساس غريب اوي انك تكتب علي النت و الناس كلها تشوف اللي انت بتكتبه.احساس مختلف طبعا عن كتابتك علي الفيس بوك او تويتر لان البلوج فكرته مختلفه.انت بتقري مدونه شخص مش صاحبك و غالبا عمرك ما شفته لكن بتحترم اراءه و شايف ان دماغه فيها حاجه.هنا بقي المشكله! المشكله ان انا انسان طبيعي جدا عمر ما كان ليا اراء متفرده ولا تحليلات ثاقبه.انا مجرد مهندس مهتم ببلده و نفسه تبقي في وضع افضل و لي ارائي الغير مسيسه علي الاطلاق!باختصار انا مواطن بيحب ببلده و بيكتب اللي بيحس بيه علطول من غير وجع دماغ! هل التجربه دي هتنجح؟ هل هلاقي اللي اكتبه اصلا؟! هل لو لقيت اللي اكتبه هلاقي اللي يقرا؟!

 كل ده كلام سابق لاوانه.انا قررت بعد ما افنيت عمري علي النت(من سنه 1999 تقريبا!) اني اخيرا لازم تبقي لي مدونه,اشمعني انا يعني؟!

معرفش هاتكلم في ايه المره الجايه.بس عارف ان مصر بقي فيها 100 حاجه غريبه بتحصل كل يوم.رهاني ان علي الاقل واحده منها هتكون تستحق التعليق!

سلام مؤقت!